|
لازمة: شتي يا دني وصيفي بنفس البناية في ناس بتاكل خروف وناس السرماية
او: شتي يا دني وصيفي بنفس البناية في ناس بتلبس ميو وناس الكنزاية
**********************
في ناس بتاكل رمان وفي ناس بتاكل قضبان
وفي ناس بتاكل لبن وفي ناس بتاكل بدن
شي بردان وشي فزعان بوجو المراية
**********************
في عيلة بتحمل ساطور قال بتقرب الناطور (2)
وفي عيلة ان قالت بنجور راح يقطعوا عنها النور
شي محظور وشي محشور وأكل محشاية
**********************
هيدا الي بيوا مختار وهيدا المسنود من الجار (2)
وهيدا لسانه تلات شبار بياخد وبجيب خبار
بالتوفيق يا توفيق مكسر عصاية
***********************
هيدا طابق للزوات وهيدا طابق للبدلات (2)
وهيدا طابق بالاكلات وهيدا طابق بالرزقات
وطابق مر وعمبحر وما في شراية
***********************
عنا شقة للنواب وعنا شقة للاحزاب (2)
وعنا شقة قرايب وطنية وحبايب
وفي مامور وفي انبور متل المأتاية (او في دبور وفي قرقور متل الحرباية)
***********************
لو بتشوفوا هالناطور فالح فينا بارض البور (2)
بالفلاحة يخزالعين فالح ميلة من الميلين
لابشور ولا دستور ولابس عباية
***********************
في ناس بتخبز مرقوق وفي ناس شم ولا تدوق (2)
وفي ناس صارت عالخازوق وكيف ما عملت ما بتروق
يا فاروق يا مقروق شغلك انكاية
***********************
في شقة راح منبيعا فلو منا السميعا (2)
البناية العمنعيرا ما جابت ولا ليرة
يا فؤاد ويا مقداد شو هالحكاية
***********************
كان في طابق للحكيم مسكر بابوا عالزعيم (2)
قاموا حجزوا هالمالك ورتوا لمالك
بلا عزاب يا فؤاد السيدة منجاية
***********************
هيدا مصادر على الروف وهيدا دافع ومنتوف(2)
وهيدا لاعب بالعيار وهيدا ما بيدفع اجار
سهار سهار سماع خبار وشوف النهاية
***********************
هيدا فرحان وسعيد وهيدا بطل عنده عيد(2)
وهيدا ابنة صار بعيد صاير خرفان البعيد
وهجي وعيدوالله يزيد بعدا مبداية
***********************
هيدا العميحلم برغيف وهيدا الاكله صار خفيف(2)
وهيدا خفيف ونضيف زارع حشيشة تكييف
يا لطيف هالعفيف مرته مغداية
***********************
وهيدا العندو عمارة وقاعد عنا جكارة(2)
وعمال يشرب سيجارة وعمببصبص عالجارة
يا ناطور يا امور ضوي اللمباية
***********************
ومرة المختار مختارة صوتا متلي العمارة(2)
ولم بتهوبر هوبارة بتزلغط الامارة
يا مختار متلي الدار وشارب متاية
***********************
وفي طابق ما بيتهدا بدوا العمارة يهدا(2)
قلنالو قوم تمدا بعدك اكل مغدا
تبقى اجماد يا زياد بدها تطراية
***********************
وفي عالم جونا زيارة ضيفناهن سيكارة(2)
احتلو طابق بغارة وزركولا لساره
وقلو خود بو ايود جايزة ترضاية
***********************
وعنا بكل طابق لغة الكبير منقله إنغا(2)
والشايب بمغمغها وللحلوة بدغدغها
يا فتاح يا رزاق ملا حرماية
***********************
اللي جارو قبل دارو الما ينبّت بعد حمارو(2)
الي تجوز امو عمو واللي مش حامل همو
كل مين دق علينا الحق وخلصة الحكاية
***********************
وهيدا اللي عطيوا وسام معلق فردو بالحزام(2)
وهيدا القصوله اللسان معلي صوته بالحمام
يا سلام علبنان لحمة مقلاية
***********************
وفي عيلة لايش تريدا رفعت ايدا بعيدا(2)
قالولها عمبتزيدا ونبهوها لاتعيدا
ايش تريد كفريد مجدرة مصفاية
***********************
وفي عيلة يوجهلا الخير دغري بيفتحولا السير(2)
وفي عيلة لو عملت طير محسوبه عبيت صفير
عالسريع بلا تكويع حاجز وقاية
***********************
وفي عيلة هي ربا وعمال تضحك بعبا(2)
بتدعوس ما بتتخبا ما فيك الا ما تسبا
قبل الضهر وبعد الضهر وقت التمشاية
***********************
وفي عيلة فتحت قلم قامت رشحت صنم(2)
وفي عيلة بلا ندم قررت ترعى غنم
والبسمات عالجبهات كتير معلاية
***********************
وفي عيلة من بيت مفتاح هجمت على بيت قدواح(2)
وفي عيلة من بيت مفخوت لعبو فيها بب فوت
عملك دوش بالطربوش وبلا تنواية
***********************
وفي عيلة من بيت يلا شو ما بيعطيها الله(2)
وفي عيلة مش حيلا الشاطر ما يموت والله
كول وشكور وقاف بالدور الرقبة موطاية
***********************
وفي طابق كله اشباح لا بزيح ولا بينزاح(2)
وفي طابق عمله سواح ليرتاحوا ونرتاح
يا فتاح يا مداح ملا فكراية
***********************
وفي عيلة بتاكل خروف وفي عيلة بتاكلها كفوف(2)
وفي عيلة صوفا منتوف وج ربا مش عم بتشوف
يا رئيف يا رؤوف عملها دعاية
***********************
وفي عيلة من بيت قيقا بيقربوا للشقيقة
افكارن شو دقيقة باظو البيظة بدقيقة
بق بقيق بق بقيق بلشنا نقايي
***********************
وفي عيلة من بيت بارون حطوا خيمة عالبلكون
وان صيفت في خيمة وما بخافوا من الغيمة
عاليمين وعالشمال بتبري المبراية
***********************
في عيلة بتاكل بصل حتى تنسي اللي حصل
وفي عيلي بلا كسل بدا تكتر النسل
الا يزيد هالعديد قالت الداية
***********************
في عيلة عمتاكل توم حتى تنسي هالهموم
وفي عيلي عندا ادوم راسو مروس ومبروم
مش مهظوم هالادوم بلا عصاية
***********************
في عيلة بتحكى برنجي ضربت حالها بغنجة
وفي عيلي الله ينجي بي العيلة باطنجي
للبناية ما في شغل موصى توصاية
***********************
في عيلة عاهلميلة صارو كل مين بميلة
وفي عيلي هاك الميلة مجموعين كل ليلة
اكل وكاس شو هالناس ولله مسلاية
***********************
وطابق صار بالمستشفى ولا واحد قادر يغفى
وفي طابق فاتح دبكة وعندن كل ليلة عركة
ريتو ينام بلا حرام ولا مخداية
***********************
وفي طابق اذا اختلفوا البناية كلها جرفوا
واذا رجعوا واتفقوا اهل البناية فلقوا
بكل صباط وعلبلاط عنا ابراية
***********************
وفي شقة بتعمل كاتو بتسهر كل ليلة بباتو
وفي عيلة عمبنطوا كل واحد باوطو
بطيروا وبغطوا على المكواية
***********************
وفي عيلة الله يعينا البرغش حارقلا دينا
وفي عيلة عمبتكوينا زوم الكينا بتسقينا
هالتعتير من هالبير ولله معباية
***********************
وفي عيلة بتقلك هاي وفي عيلة بتقلك باي
وفي عيلة ياي قهوة لا بشرب شاي
على النار للزوار عبي الركواية
***********************
وفي عيلة عندها خدام بالخدمة شي كثير تمام
وفي عيلة من بيت هلكان الله يساعد هالنسوان
مش معقول هالبيوت بدها جلاية
***********************
وفي عيلة من بيت كلا بالزيت عمال تتألا
وفي عيلة من بيت نعم اغدقوا عليها النعم
انشالله يعوم هالنعوم بقلب المصفاية
***********************
وفي طابق للبصبصة وفي طابق للخصخصة
وفي طابق للحصحصة وفي طابق للمصمصة
حص ومص واوعى تغص صدرا مغطاية
***********************
وفي عيلة شو فقيرا ما معها ولا ليرة
مصرياتا بالدولار وبتقضيها عالبي آر
يا ج آر لا تكون حمار ملا رواية
***********************
وفي عيلة من بيت تهريب عم تاكل عسل وزبيب
وفي عيلة من بيت تهذيب قطعوا عنا الحليب
والتاديب بالقضيب هيك مصفاية
***********************
وفي عيلة ضهرا مسنود بتصرح عصوت العود
وفي عيلة ضهرا مقظوع خفتولا صوتا عالكوع
وضوي شموع للدموع توقف تشلاية
***********************
بالملجا عمبانه متل الصوص البقنه
والعنا ما بحنوا بيعقصونا وبونوا
لايش ويش منه ليش بدكن شقفاية
باريس 11/10/2001 | 
