|
لازمة: عالدربكة الدربكة حالتنا شو بتبكي
شلحونا ها لشروال والشنتان بلا دِكة
************************
عملوا شعبي شعيبية وفصلوا عنو الشعبية(2)
وفردوه بعلبة فردية وقطعوا عنه الحرية
لظروف الاقليمية منعوا يغني غنية
فيها استقلالية او نغمة سيادية
في يغني طائفية يحمس باسكيت يومية
اغاني عاطفية يغني الصبح وعشية
افلام مكسيكية باللهجة المحلية
لكن ان علا صوته رقبته بدها فَكة
************************
بقلبه ما في ولا مانع يصّرخ ولا مين سا مع(2)
اوعا ينزل عالشارع الدولة دغري بتسارع
للمصلحة الامنية وتمنع الصهيونية
من خطة جهنمية توعي الضمير في
تنمي بذور الحرية ونطالب بالقضية
للجارة الاخوية ونقلها عنا فِكي
************************
عصعيد الحرية كيف منقيسها يا خي(2)
هيدي قصة نسبية منقيسها بواقعية
بالضربةالوقائية واللبطة البلدية
المدقة الاخوية تتصير اللحمة نية
بالكبة اللبنانية من مازتنا الشهية
بالعولمة الدولية بالنشرة المحلية
بالروح الوطنية الاحكام القضائية
ومنيقسة بالوقية عالاكيد مش بالتنكة
************************
بدنا نبصر تبصيرا والليرة شو مصيرا(2)
كانت هي الاميرة صارت عِنا اجيرة
الدولار وطى تسعيرا الساسة لعبوا بتعييرا
وصارت روحها قصيرة وراسها بكعب الحصيرا
ولو قلبها عملوا مفتوح عمرها قياسو بالتكة
************************
عجقة طريق المطار العالم راحت عالاسفار(2)
ما في شب والا طار عقله مية مرة بالنهار
ال سافر هيدا الشطار الصامد قالو عنه حمار
بده يفضى عِنا الدار وما يبقى الا المختار
وبعض الساسة من الكبار يلي عميعلك علكة
************************
لو يتشوفوا هالرفيق كيف حطوا عصدره الضيق(2)
قطعوا عنه الشهيق عملوا مقلب في عالريق
كان فاكر انه عتيق وانه جسمه كتير خزيق
طلعت براسه لتوفيق وفوق الشرطوطة دكة
************************
اوعى من الحرب نوعى المصالحة ممنوعة(2)
هي شغلة مش مشروعة تعود العيلة مجموعة
الارزة ترفرف مرفوعة وامي تكفكف دموعها
قرطة متل البالوعة مقسومة مش مجموعة
فيها ناس مسبوعة وفيها ناس منزوعا
وفيها شلة مصروعة فايت كوعا ببوعا
توقوا من صيبة العين حكي يا حكومة حكي
************************
بدولة حقوق الانسان عصاية طولا متران(2)
للصبايا والصبيان مية بالمية رمان
تعلم عجلدن اوام تلونهن كل الالوان
تعلمهن كلمة آمان وتقصرلن هاللسان
تيتذكروا السعدان الاطرش الاعمى الخرسان
ما تنسى انت بلبنان وضلك حافظ عالنظام
وما تنسى تحط الحزام قاعد ورا او قدام
وانت ماشي اوعى تنام وخلي اجرك عالفرام
لبناني فايت بالحيط بسرعة مية بالتكة
*****************
وبطباق العشر تيام ما عرف وين بدو ينام (2)
او بنفذ الكلام او لا مخدة ولا حرام
الاستاذ السيد نفسه واعي وقلبت نفسه
يلي نفخوا نفسه بدون ما توخذوا نفسه
عدل نفسه بنفسه ومن دون ما يعلن اسفه
يلا يا نواب يلا قوموا نرقص عالدبكة
************************
الدولة بتحكي بالعفة الدولار اوعى تلعب في(2)
وهي بتلعب بالمخفي لحتى الليرة تشفي
وتبقى الليرة المكسورة جامد كسرا كالصورة
وترجع حلوة وامورة وتفتِّح متل المنتورا
وترجع تلبس تنورة لتحت الركبة مستورة
تفرفش عمي السنيورة وزير حكومة الصورا
قومي يا حكومة قومي ودكي بالقصبة دكي
************************
بنت وشب بالكحالة حكيوا بصوت العالي(2)
اللي عميخطر عبالي فجاة ولعت الحالة
قالوا هيدي سئآلي فيها روح العمالة
ومن اشباح الليالي قاموا ساقوا الملالة
وكمّشولن بالميات شي شباب وشي بنات
وقفوهن بحبوسات واحد رايح واحد آت
واحد ضاهر واحد فات واماتن اكلت وهلات
وراحت تبرم عالفتوات وقالولن بدنا فديات
والله يساعد البيات ما معن حق الخبزات
وقاللولو يا معتر هات هيدا حق الحريات
وقسموهن لفئات شي عونية وشي قوات
هيدا انسانه محلول وهيدا شبابه محظور
وهيدا خرجوا النظارة ما بتلبقلوا الحضارة
هيدا لابس نضارة وهيدا بدو طيارة
وهيدا كان بالمختارة وهيدا اخته دواره
وهيدا هوبر هوباره زلزلة الامارة
يا دولة يا قهارة انكي بشعبك انكي
************************
من بكركي اول بيان صرخة حق وعنفوان(2)
لون ربيعه للبنان وايلوله تحول نيسان
فتّح عقدة اللسان بمنابر وين ما كان
آخرها قرنة شهوان الي حشرة بعض الأركان
فاخرجولها الافلام فخر الصناعة بلبنان
عُرض علينا بالالوان ربح بمهرجان كان
رجعنا مبارح بالديمان شفنالك تاني بيان
تيمنعنا من النسيان ويذكرنا بالعنوان
إنه لإلنا لبنان ومجده معطى لبكركي
باريس 09/08/2001
| 
